Nepal Drishya

धादिङको खहरे बजारमा दर्ता नभएका पसल बन्द

Nepal Drishya २७ जेठ, २०८२ | 09 Jun, 2025

धादिङको त्रिपुरासुन्दरी गाउँपालिकाले वडा नम्बर ७, खहरे बजार क्षेत्रमा बजार अनुगमन गरेको छ । अनुगमनका क्रममा स्थानीय निकायमा दर्ता नभएका केही पसल तथा व्यवसायहरू बन्द गरिएको गाउँपालिकाले जनाएको छ ।

गाउँपालिकाका उपाध्यक्ष देवराज धरेलको नेतृत्वमा गएको अनुगमन टोलीले व्यवसायीहरूलाई व्यावसायिक मर्यादा र कानुनी दायराभित्र रही सञ्चालन हुन र पालिकामा अनिवार्य रूपमा दर्ता गर्न अनुरोध गरेको छ । संयोजक धरेलका अनुसार स्थानीय निकायमा दर्ता नभई मापदण्डविपरीत सञ्चालनमा आएका पसललाई पटक–पटक जानकारी दिँदा पनि कानुनको उल्लङ्घन भएपछि बाध्यात्मक रूपमा बन्द गर्नु परेको हो ।

गाउँपालिकाले व्यवसायीहरूलाई पालिकासँग समन्वय गरी आवश्यक प्रक्रिया पूरा गरेर व्यवसाय सञ्चालन गर्न आग्रह गर्दै आगामी दिनमा अझ कडा अनुगमन गर्ने चेतावनी पनि दिएको छ । उपभोक्ताको हक अधिकार संरक्षण गर्ने उद्देश्यले बजार अनुगमनलाई नियमित बनाउने जनाउँदै गाउँपालिकाले सबै व्यवसायीलाई जिम्मेवार र कानुनसम्मत बन्न आह्वान गरेको छ ।

त्रिपुरासुन्दरी गाउँपालिकाको नेतृत्वमा उद्योग वाणिज्य संघ धादिङ, स्थानीय र पत्रकारको सहभागितामा बजार अनुगमन कार्यलाई निरन्तर जारी राख्ने गाउँपालिकाले बताएको छ ।