Nepal Drishya

डम्बरलाई बधाई,'म' जनतासँग जगत भन्ने नाराका साथ मतदातासँग जोडिइरहनेछु

Nepal Drishya ८ मंसिर, २०७९ | 24 Nov, 2022

धादिङ क्षेत्र नम्बर २ (२) बाट विजयी भएका राष्ट्रिय प्रजातन्त्र पार्टीका डम्बर तामाङलाई माओवादी केन्द्रका जगत सिंखडाले बधाई दिएका छन् । बधाईसँगै यो बीचमा गर्ने नराम्रो कामको खबरदारी गर्ने र म जनतासँग जगत भन्ने नाराका साथ मतदातासँग जोडिने उनको प्रतिबद्धता समेत रहेको छ ।

लोकतान्त्रिक वाम गठबन्धनका साझा उम्मेदवार रहेका सिंखडाले एमाले राप्रपा गठबन्धनमा तामाङसँग १ सय ३१ मतले हारेका हुन् । तामाङले १४ हजार ४ सय ६१ मत ल्याई जित हासिल गरेका हुन् भने उपविजेता सिंखडाले १४ हजार ३ सय ५० । प्राप्त अन्तिम मत परिणाम प्रश्चात सिंखडाले सामाजिक सञ्जाल फेसबुकमा तामाङलाई सफल कार्र्यकालको शुभकामना दिएका छन् ।
उनले तामाङसँग जनताको पक्षमा गर्ने हरेक कार्यमा हातेमालो गर्ने र सधैंझै जनविरोधी कामको खुलेर विरोध समेत गर्ने बताएका छन् । उनले केहीको व्यक्तिगत स्वार्थको कारण गठबन्धन प्रभावकारी नभएको आशंका समेत गरेका छन् ।

"प्रतिगमनविरोधी गठबन्धन बनाएर चुनावी अभियानमा होमिएका थियौं, "उनले भनेका छन्, "अग्रगमन, संविधान र लोकतन्त्रको रक्षाका लागि हामीसँगै उभिँदै आएका पनि छौं । यसका बावजुद जो सीमित व्यक्तिगत स्वार्थलाई केन्द्रमा राखेर गठबन्धन संस्कृति र पार्टी भावनाका विरुद्ध उभिनुभयो, उहाँहरूसँग म लोकतान्त्रिक गणतन्त्र र परिवर्तनका उपलब्धि जोगाउने अभियानमा हार्दिकतापूर्वक सहकार्य गर्ने नै छु ।"

उनले थपेका छन्, "किनकि सदनमा राजतन्त्रको पक्षमा, संघीयता, धर्मनिरपेक्षता, समानुपातिक र समावेशिताको विरुद्धमा नारा लाग्दा हामी चुनावी अभियानमा ‘मित्रहरूबाट भएका कमजोरी सम्झेर अल्मलिने छैनौं । त्यो सुविधा हामीसँग हुनेछैन । समीक्षा, आत्मसमीक्षा जीवनमा गर्दै गरौंला ।"

उनले आफू म जनतासँग जगत भन्ने नाराका साथ मतदातासँग जोडिने प्रतिबद्धता समेत जनाएका छन् ।

'म' जनतासँग जगत भन्ने नाराका साथ यो क्षेत्र, यहाँका सम्मानीत मतदातासँग जोडिइरहनेछु, "उनले भनेका छन्,"विभिन्न कारणले निर्वाचनको लोकतान्त्रिक विधिमा पछि परेँ, तर जनताको भरिया बनेर जनसेवामा थप मेहनतका साथ क्रियाशील भइरहनेछु । तपाईंको दुःख सुखको साथी भइरहनेछु । पाखा पखेराहरूमा सक्रिय भइरहनेछु । हामीले हालेको विकासको जगमा समृद्धि ठड्याउन क्रियाशील भइरहनेछु । यो पराजयले भनेको छ मैले यहाँ थप मेहनत गर्नुपर्नेछ । म यसलाई हार्दिकतापूर्वक स्वीकार्छु ।

बितेको पाँच वर्ष म जति यो भूगोलमा दौडिएँ, सक्रिय भएँ, यसलाई थप रफ्तार दिनेछु । छिट्टै निर्वाचन क्षेत्र केन्द्रित अभियानमा जोडिने प्रतिबद्धता व्यक्त गर्दै पुनश्चः सबै मतदाताप्रति हृदयदेखि नै धन्यवाद व्यक्त गर्न चाहन्छु,उनले भनेका छन् ।"

Published Date: ८ मंसिर, २०७९ | 24 Nov, 2022

Post Comments